‘Pesta Lawas’ bisi nyelai mimit, ku Tengah

Selamat Pagi Malaysia (RTM1)

ARAM BERAMI: Awang Tengah maya diintebiu ba program ‘Selamat Pagi Malaysia’ di TV1 ngelakuka Pesta Lawas ti deka diatur berengkah 25-27 Julai tu ila.

Diatur begulai enggau RTM nyerumba ‘Jelajah Pemasaran Ekspo enggau Gegar Olimpik’

KUCHING: Urung 150,000 iku peranak menua tu nyengkaum ari menua tasik dipelaba deka datai ngulu ‘Pesta Lawas’ ke deka diatur berengkah 25 ngagai 27 Julai tu ila.

Menteri Pengatur Pemansang enggau Pengeraja Asal Kedua, Datuk Amar Awang Tengah Ali Hasan madah, sekali tu pengerami nya deka mantaika mayuh macham main ke baru ke enda kala dipeda sebedau tu.

Iya madah, taun nyin tadi, pengerami nya mujur narit urung 130,000 iku mensia ngagai pengerami nya alai taun tu dipelaba pemayuh nya deka nambah.

“Sekali tu, Pesta Lawas deka diatur begulai enggau RTM laban kami bisi ngatur siti pengawa ke berat dalam pengerami tu, ke digaga beserimbai enggau pekit Lumba enggau Main Olimpik, iya nya ‘Jelajah Pemasaran Ekspo dan Gegar Olimpik’,” ku iya madah lebuh dirandau nengah program televisyen, ‘Selamat Pagi Malaysia’ ke ditabur maya nya di TV1 kemari.

Awang Tengah ti mega nyadi Menteri Perengka Guna madah, entara program ke agi diangkatka, iya nya Regata Lawas laban ku iya, taun tu pekit ‘lumba kerbau’ enda diatur.

“Kami nadai ngatur ‘lumba kerbau’ laban program ke kelau sekut endar, tang taja pia, sebarang program ke enda ulih digaga maya tu, deka diatur ba maya bukai,” ku iya ke udah ngasuh Opis Pelilih Menua Lawas nganti program ke enda digaga maya tu, tang digaga ba maya bukai.

Entara kebuah bukai ngatur program baka tu, laban deka ngangkatka Lawas nyadi palan dagang temuai ke nyelai ari sitak bukai laban jaku orang ke diau dia enda sebaka enggau endur bukai di menua tu.

“Kami di Lawas makai ‘dadah’ tang enda ngasuh kami ngelu laban tu bansa pemakai ke digaga ari ikan ‘aur-aur’ tauka tamban, ke mega ulih digaga nyadi salai ‘tahai’,” ku iya.

Kelimpah ari nya mega, iya madahka Lawas bempu mayuh endur ke manah ke ulih digagai baka ai pegung ai angat, Gunung Murut sereta sitak bukit ke manah alai nemuai.

Kepala Menteri Pehin Sri Abdul Taib Mahmud deka diberi basa bejadika ‘Pesta Lawas’ (26 Mei) lalu deka ditutup Tuai Megai Menua, Yang DiPertua Negeri Tun Datuk Patinggi Abang Muhammad Salahuddin (hari siti).

by Jacqueline David. Posted on May 14, 2012, Monday